रोहित पवारांना हायकोर्टाचा दिलासा, बारामती अ‍ॅग्रो सुरु राहणार
मुंबई : राष्ट्रवादी काँग्रेसच्या शरद पवार गटाचे नेते आणि कर्जत जामखेडचे आमदार रोहित पवार यांना मुंबई हायकोर्टाकडून दिलासा मिळाला आहे. महाराष्ट्र प्रदूषण नियंत्रण मंडळानं बारामती अ‍ॅग्रोचे प्लांट बंद करण्याचे आदेश दिले होते. त्या आदेशाला मुंबई हायकोर्टानं स्थगिती दिली आहे. या प्रकरणाची पुढील सुनावणी आता ६ ऑक्टोबर रोजी होणार आहे. रोहित पवार यांनी मुंबई हायकोर्टाचे आभार देखील मानले आहेत.
रोहित पवार यांना मुंबई हायकोर्टानं ६ ऑक्टोबरपर्यंत अंतरिम दिलासा दिला आहे. बारामती अ‍ॅग्रो बंद करण्याच्या महाराष्ट्र प्रदूषण नियंत्रण मंडळाने दिलेल्या आदेशाला मुंबई हायकोर्टाकडून ६ ऑक्टोबरपर्यंत अंतरिम स्थगिती देण्यात आली आहे. यापूर्वी भाजपचे आमदार राम शिंदे यांच्या तक्रारीनंतर कंपनीविरोधात दाखल झालेल्या एफआयआरच्या अनुषंगाने कारवाई करण्यासही हायकोर्टाने अंतरिम स्थगिती दिली होती..
आता रोहित पवार यांच्या नेतृत्वाखालील बारामती अ‍ॅग्रोने एमपीसीबीची नोटीस आणि आदेशालाही याचिकेद्वारे आव्हान दिले आहे. या याचिकेवर ६ ऑक्टोबरला सुनावणी घेऊ, तोपर्यंत एमपीसीबीच्या आदेशावर कोणतीही कारवाई करण्यात येऊ नये, असे न्यायमूर्ती नितीन जामदार यांच्या नेतृत्वाखालील खंडपीठाने आपल्या अंतरिम आदेशात स्पष्ट केले.
रोहित पवारांचा विरोधकांना इशारा
‘बारामती ॲग्रो’ च्या प्लांटवर कारवाई करण्यास स्थगिती दिल्याबद्दल मी सर्वप्रथम हायकोर्टाचे आभार मानतो… तोडफोड करून मिळवलेल्या सत्तेच्या छत्राखाली राहून सुडाचं राजकारण करणं सोपं आहे, ते करणाऱ्यांनी करत रहावं.. त्यांच्यावर सूड कसा उगवायचा याचा निर्णय निवडणुकीत जनता घेईल, असा इशारा रोहित पवार यांनी दिला आहे.
रोहित पवार पुढे म्हणाले की, पण यानिमित्ताने माझं त्यांना एक सांगणं आहे की, महाराष्ट्रात कधीही नव्हता तो राजकीय द्वेषाचा घाणेरडा पायंडा तुम्ही पाडताय… एका अर्थाने राजकीय द्वेषाचे बाप तुम्ही आहात, पण लोकशाहीत सामान्य जनता ही बाप असते, हे विसरू नका. त्यामुळं आज जरी तुम्ही खुशीत असलात तरी भविष्यात हेच अस्र तुमच्यावरही उलटल्याशिवाय राहणार नाही. ‘जिनके घर शीशे के होते हैं, वे दूसरों पर पत्थर नहीं फ़ेंका करते’, असा इशारा देखील त्यांनी दिला.
