मृत्यूचे तांडव सुरुच: छत्रपती संभाजीनगरच्या घाटी रुग्णालयात २४ तासांत १८ रुग्णांचा मृत्यू

नांदेड रुग्णालयातील दुर्घटनेत ४ अर्भकांसह आणखी ७ जणांचा मृत्यू

छत्रपती संभाजीनगर,३ ऑक्टोबर /प्रतिनिधी :- नांदेडच्या डॉ. शंकरराव चव्हाण शासकीय रुग्णालयात २४ तासात २४ रुग्णांचे मृत्यू झाल्याची धक्कादायक घटना घडली. या घटनेमुळे राज्यभरात खळबळ उडाली. राज्यातील आरोग्य व्यवस्थाच व्हेंटीलेटरवर असल्याचं यामुळे सिद्ध झालं असल्याची टीका विरोधकांकडून केली जात आहे. अशात आता छत्रपती संभाजीनगर येथील घाटी रुग्णालयात गेल्या २४ तासांत १० रुग्ण दगावल्याची घटना समोर आली आहे. तसंच आता हा आकडा १८ वर पोहचला आहे. शासनाकडून मात्र यावर स्पष्टीकरण देताना औषधांच्या तुटवड्यामुळे किंवा डॉक्टरांच्या कमतरतेमुळे हे मृत्यू झाले नसल्याचा दावा केला आहे. मृत पावलेले रुग्ण हे बाहेरून रेफर केलेले किंवा मरणासन्न अवस्थेत रुग्णालयात दाखल झाले होते, अशी माहिती रुग्णालयाचे डीन संजय राठोड यांनी दिली आहे.

काय म्हणाले डीन संजय राठोड?

छत्रपती संभाजीनगर शासकीय घाटी रुग्णालयाचे डीन संजय राठोड यांनी घाटीत गेल्या २४ तासांत झालेल्या १८ रुग्णांच्या मृत्यूवर स्पष्टीकरण दिलं आहे. ते म्हणाले की, घाटी रुग्णालयात रोज १० ते १२ मृत्यू होत असतात. त्यामुळे या रुग्णालयात महिन्याकाठी सरासरी ३०० रुग्ण दगावतात. या रुग्णांमध्ये बाहेरुन खासगी रुग्णालयात रेफर केलेले व उशिरा दाखल केलेले रुग्ण अधिक असतात. तर, औषध तुटवडा आणि डॉक्टर कमतरतेमुळे एकही मृत्यू झाला नाही, असं राठोड यांनी सांगितलं.

शरद पवार यांनी केलं ट्वीट….

छत्रपती संभाजीनगरच्या शासकीय घाटी रुग्णालयात घडलेल्या प्रकारावरुन राष्ट्रवादी काँग्रेस पक्षाचे अध्यक्ष शरद पवार यांनी ट्वीट करुन आपली प्रतिक्रिया दिली आहे. ते म्हणाले की,

“नांदेड येथील शासकीय रुग्णालयात २४ तासात १२ नवजात बालकांसह २४ रुग्णांचा मृत्यू होण्याच्या दुर्दैवी घटनेला एक दिवस होत नाही, तितक्यात औरंगाबाद येथील घाटी रुग्णालयात २ नवजात बालकांसह ८ रुग्णांचा मृत्यू झाल्याची घटना शासकीय आरोग्य व्यवस्थेला काळीमा फासणारी आहे. कालची घटना ताजी असताना देखील प्रशासनाला जाग आली नाही ही, अतिशय दुर्देवी बाब आहे. मृतांच्या कुटुंबियांच्या दु:खात मी सहभागी असून, सहवेदना व्यक्त करतो. मृत व्यक्तींना भावपूर्ण श्रद्धांजली….” असं ट्वीट शरद पवार यांनी केलं आहे.

काँग्रेसची सरकारवर टीका

नांदेड:-नांदेडच्या शासकीय रुग्णालयात मृत्यूचे नृत्य सुरूच आहे. काल रात्रीपासून येथे ४ अर्भकांसह आणखी ७ जणांचा मृत्यू झाला आहे. सरकारी रुग्णालयांमध्ये मृत्यूची मालिका सुरूच असून, सरकारने याची जबाबदारी निश्चित केली पाहिजे, असे मत माजी मुख्यमंत्री अशोक चव्हाण यांनी मंगळवारी व्यक्त केले.

टीकेचा सामना करत असलेले मुख्यमंत्री एकनाथ शिंदे यांनी पुढील पावले उचलण्यापूर्वी या घटनेची संपूर्ण माहिती घेणार असल्याचे सांगितले. काँग्रेस अध्यक्ष मल्लिकार्जुन खर्गे, खासदार राहुल गांधी, प्रियांका गांधी यांनी या दुर्घटनेबद्दल शोक व्यक्त केला, भारतीय जनता पक्षावर टीका केली आणि उपाययोजना करण्याचे आवाहन केले.

“ही काही पहिलीच वेळ नाही, ऑगस्ट २०२३ मध्ये ठाण्यातील रुग्णालयात १८ जणांचा मृत्यू झाला होता. त्यामुळे सरकारी आरोग्य विभागावर प्रश्नचिन्ह निर्माण झाले आहे. खर्गे म्हणाले, नांदेड दुर्घटनेची चौकशी करून दोषींना कठोर शिक्षा व्हावी, अशी आमची मागणी आहे. राहुल गांधी तिखट स्वरात म्हणाले, “भाजप सरकारकडे प्रचारासाठी हजारो कोटी रुपये आहेत, पण मुलांच्या औषधांवर नाही. भाजपसाठी गरिबांच्या जीवाची किंमत नाही.”

प्रियांका वड्रा यांनी आवाहन केले की, “सरकारने जबाबदार असलेल्यांवर कठोर कारवाई करावी आणि पीडितांच्या कुटुंबीयांना भरपाई द्यावी.” राष्ट्रवादी काँग्रेसचे अध्यक्ष शरद पवार, कार्याध्यक्षा सुप्रिया सुळे, प्रदेशाध्यक्ष जयंत पाटील, शिवसेनेचे (यूबीटी) नेते आदित्य ठाकरे, खासदार संजय राऊत, सुषमा अंधारे, महाराष्ट्र नवनिर्माण सेनेचे प्रवक्ते संदीप देशपांडे आदींनी नांदेडच्या रुग्णालयात झालेल्या मृत्यूची दखल घेतली. प्रतिक्रिया दिल्या आहेत.

या मृत्यूंना महाराष्ट्र सरकार जबाबदार असून आरोग्यमंत्री तानाजी सावंत यांनी राजीनामा द्यावा, अशी मागणी सुळे यांनी केली.

विशेष म्हणजे सोमवारी दुपारी नांदेडच्या डॉ.शंकरराव चव्हाण शासकीय वैद्यकीय महाविद्यालय व रुग्णालयात १२ अर्भकांसह २४ जणांचा मृत्यू झाल्याची घटना उघडकीस आल्याने राज्य हादरले आहे. चव्हाण म्हणाले की, डीन डी.आर. नर्सिंग आणि वैद्यकीय कर्मचाऱ्यांची कमतरता, काही उपकरणे कार्यरत नसणे किंवा काही विभाग विविध कारणांमुळे निष्क्रिय असल्याची माहिती त्यांनी दिली. अंधारे यांनी आरोग्य अधिकार्‍यांवर निष्काळजीपणाचा आरोप केला आणि ऑगस्टच्या मध्यात ठाण्यातील छत्रपती शिवाजी महाराज शासकीय रुग्णालयात अशाच प्रकारे १८ रुग्णांचा मृत्यू झाल्याचा उल्लेख केला.