‘मंगलमूर्ती मोरया’च्या जयघोषात जालन्यात विघ्नहर्त्याचे स्वागत
जालना ,१९ सप्टेंबर /प्रतिनिधी :-गणपती बाप्पा मोरया, मंगलमूर्ती मोरयाच्या जयघोषात, गुलालाची उधळण आणि ढोल-ताशांच्या दणदणाटात जिल्ह्यात मंगळवारी लाडक्या गणेशाचे आगमन झाले.
गणपतीला घरी घेऊन जाण्यासाठी भक्तांनी गर्दी केली. सार्वजनिक गणेश मंडळांच्या मूर्तींची प्राणप्रतिष्ठापना सायंकाळी उशिरापर्यंत सुरू होती. या निमित्ताने बाजारपेठेत कोट्यवधींची उलाढाल झाली. लाडक्या गणेशाची वाट पाहणार्या भक्तांनी सकाळपासूनच बाजारपेठेत गर्दी केली होती. गणेशाला घरी नेताना आबालवृद्धांचा उत्साह द्विगुणित झाला होता.गुलाल आणि फुलांची उधळण करत सर्वत्र जयघोष केला जात होता.