पुत्रवियोगाच्या धक्क्याने माता-पित्याचाही मृत्यु,डॉ.संजय नवले यांच्या आई-वडिलांचेही निधन
औरंगाबाद ,२४ एप्रिल /प्रतिनिधी :
कुटुंबातील सर्वात लाडक्या मुलाच्या अकाली मृत्यूचा धक्का बसल्याने आई-वडिलांनीही प्राण सोडल्याची हृदयद्रावक घटना घडली आहे. या घटनेत दिवंगत प्राध्यापक संजय नवले यांचे वडील माणिकराव व आई मंदाकिनी हे मृत्यू पावले आहेत.नवले दांपत्याच्या पश्चात प्रा.अरविंद (शिवाजी महाविद्यालय, उदगीर) व सुनील (पुणे) ही दोन मुले, मुलगी व नातवंडे असा परिवार आहे.नवले दांपत्यावर आज सकाळी धनकवडी, पुणे येथील महापालिकेच्या स्मशानभुमीत अंत्यसंस्कार करण्यात आले.
डॉ.बाबासाहेब आंबेडकर मराठवाडा विद्यापीठातील हिंदी विभागातील प्राध्यापक डॉ.संजय माणिकराव नवले (वय ५५) यांचे १५ मार्च रोजी उपचार सुरु असतांना औरंगाबादेत निधन झाले. मुळचे चोराखळी (ता.कळंब, जि.उस्मानाबाद) येथील ते रहिवाशी होते.त्यांच्यावर याच दिवशी ऊस्मानाबादेत अंत्यसंस्कार करण्यात आले. त्यावेळी उपस्थित असलेल्या आई-वडिलांना रक्तदाब कमी झाल्याने पुण्यातील बोरा हॉस्पिटलमध्ये दाखल करण्यात आले होते. उपचार सुरू असतानाच माणिकराव तात्याबा नवले ( माजी शिक्षण अधिकारी, य ८०) यांचे शुक्रवारी (दि.२३) सायकांळी पाच वाजता निधन झाले. तर दोन तासातच आई मंदाकिनी माणिकराव नवले (वय ७८) यांनीही प्राण सोडला. रक्तदाब कमी झाल्यानंतर उपचार सुरू असतानाच याच दोघांचीही प्राणज्योत मालवली.
या घटनेचे वृत्त समजताच चोराखळी गावावर शोककळा पसरली आहे.दरम्यान, डॉ.संजय नवले यांच्या पाठोपाठ आई- वडिलांचेही निधन झाल्याची घटना अत्यंत वेदनादायक असून डॉ.बाबासाहेब आंबेडकर मराठवाडा विद्यापीठातील आम्ही सर्वजण या दुःखात सहभागी आहोत, असे कुलगुरु डॉ.प्रमोद येवले यांनी नवले कुटुंबियास पाठविलेल्या शोकसंदेशात म्हटले आहे.
