‘स्वारातीम’ विद्यापीठाचा सर्वांगीण विकास साधणाऱ्या अर्थसंकल्पास अधिसभेची मंजुरी

३०७कोटी ७४ लक्ष रुपयाच्या या अर्थसंकल्पात २८ कोटी ४१ लक्ष रुपयांची तूट

उपकेंद लातूर येथील मुलामुलींच्या वस्तीगृहाकरिता २ कोटी

परभणी उपकेंद्राच्या इमारत बांधकामासाठी ५ कोटी

नांदेड  ,३ फेब्रुवारी  / प्रतिनिधी :- स्वामी रामानंद तीर्थ मराठवाडा विद्यापीठाचा सन २०२३-२४ या आर्थिक वर्षाचा एकूण ३०७ कोटी ७४ लक्ष रुपयाचा अर्थसंकल्प अधिसभासभेत मांडण्यात आला. समाजापयोगी संशोधनाला चालना देणारा असा हा अर्थसंकल्प दि. ०३ फेब्रुवारी रोजीच्या आधीसभा सभागृहातील बैठकीमध्ये सर्वानुमते मंजूर करण्यात आला.  

विद्यापीठाचे कुलगुरू डॉ. उद्धव भोसले यांच्या अध्यक्षतेखाली वित्त व लेखा अधिकारी डॉ. श्रीकांत अंधारे यांनी हा अर्थसंकल्प सादर केला. यावेळी विद्यापीठाचे प्र-कुलगुरू डॉ. जोगेंद्रसिंह बिसेन, कुलसचिव डॉ. सर्जेराव शिंदे, विज्ञान व तंत्रज्ञान विभागाचे अधिष्ठाता डॉ.एल.एम. वाघमारे, मानव्य विद्याशाखेचे अधिष्ठाता डॉ. अजय टेंगसे, परीक्षा मूल्यमापन मंडळाचे संचालक डॉ. दिंगबर नेटके यांच्यासह व्यवस्थापन परिषद सदस्य आणि अधिसभा सदस्य उपस्थित होते. 

एकूण ३०७कोटी ७४ लक्ष रुपयाच्या या अर्थसंकल्पात २८ कोटी ४१ लक्ष रुपयांची तूट आहे. या अर्थसंकल्पामध्ये सादर करण्यात आलेल्या अहवालात विद्यापीठ व संलग्नित महाविद्यालयीन विद्यार्थी विकास, कर्मचारी व अधिकाऱ्यांना विकासात्मक सुविधा, महाविद्यालय व संकुलातील संशोधन आदी. करिता भरीव तरतूद करण्यात आलेली आहे.  

त्यामध्ये उपकेंद लातूर येथील मुलामुलींच्या वस्तीगृहाकरिता २ कोटी, डांबरीकरण जोडरस्त्यासाठी ५० लक्ष, विद्यापीठ निधी अंतर्गत परभणी उपकेंद्राच्या ईमारत बांधकामासाठी ५ कोटी, सोबतच न्यू मॉडेल कॉलेज, हिंगोली आणि किनवट येथील संशोधन केंद्राकरिता शैक्षणिक आणि भौतिक सुविधा करिता भरीव तरतूद करण्यात आली आहे. यावेळी महाविद्यालयातील आणि संकुलातील संशोधनास प्रोत्साहन मिळावे याकरिता संशोधन प्रोत्साहन योजने अंतर्गत १५ लक्ष, राष्ट्रीय आणि आंतरराष्ट्रीय स्तरावरील चर्चासत्र, परिषदा, कार्यशाळा आयोजित करण्याकरिता २० लक्ष, लघुसंशोधक प्रकल्पासाठी अनिक्रमे ५० व ३० लक्ष, महाविद्यालयीन प्राध्यापकांना राष्ट्रीय आणि आंतरराष्ट्रीय स्तरावरील चर्चासत्र, परिषदा, कार्यशाळेसाठी उपस्थित राहण्यासाठी १५ लक्ष आणि संकुलातील शिक्षकांनाही १५ लक्ष रुपयांची तरतूद करण्यात आलेली आहे. भाषा दिन करिता ७ लक्ष तरतूद करण्यात आलेली आहे. विद्यापीठातील संकुलासाठी परिषदा, कार्यशाळा, चर्चासत्रे याकरिता ३ लक्ष रुपयाची तरतूद करण्यात आली आहे. 

शिक्षेकेतर घटकांचा पुरेपूर विचार करून कर्मचाऱ्यांसाठी प्रशिक्षण, चर्चासत्रे, परिषदा इत्यादी करिता १० लक्ष, कर्मचारी कल्याणनिधी करिता १५ लक्ष, कै. डॉ. शंकरराव चव्हाण संशोधन केंद्र इमारत बांधकामासाठी महाराष्ट्र शासनाकडून ४४ कोटी मंजूर झाले असून ७.४५ कोटी प्राप्त असून सन २०२२-२३ मध्ये १० कोटी किंवा सन २०२३-२४ मध्ये ३८ कोटी प्राप्त होतील या अनुषंगाने तरतूद करण्यात आली आहे. महिला जागृती विषयक कार्यशाळेकरिता ५ लक्ष,  यावेळेस मान्य झालेले अर्थसंकल्प हे विद्यापीठाशी निगडीत सर्व  घटकांना सामावून घेणारे तसेच त्यांच्या सामाजिक, शैक्षणिक, भौतिक विकास करण्यास सहय्याभूत ठरणारे आहे. 

संकुलातील संशोधक विद्यार्थ्यांसाठी ‘रिसर्च असोसिएट’ या योजनेअंतर्गत दिल्या जाणाऱ्या मानधनामध्ये २० लक्षाची तरतूद करण्यात आलेली आहे. ‘कुलगुरू सहाय्यता निधी’ या योजनेकरिता १५ लक्ष रुपयांची तरतूद केली आहे.‘विद्यार्थी दत्तक योजना’ करिता १५ लक्ष. ‘सॉफ्टस्किल अँड पर्सनालिटी डेव्हलपमेंट अँड ट्रेनिंग’ करीता २५ लक्ष. आंतरराष्ट्रीय विद्यार्थी कक्षात परदेशी विद्यार्थ्यांना आंतरराष्ट्रीय दर्जाच्या सोयी देण्याकरिता १० लक्ष. ‘स्पर्धा परीक्षा व कौशल्य विकास केंद्र’ करिता २० लक्ष. ‘स्टुडंट्स वेल्फर अँड अवार्ड स्कीम’ म्हणजेच ‘श्वास’ करिता २० लक्ष. पीएचडी संशोधक विद्यार्थ्यांना राष्ट्रीय, आंतरराष्ट्रीय परिषदा व चर्चासत्रासाठी पेपर सादरीकरणासाठी १५ लक्ष. ‘कमवा व शिका’ योजनेंतर्गत २० लक्ष. खेळाडू विद्यार्थ्यासाठी पारितोषिक योजना करिता ५लक्ष, विद्यार्थी विकास विभागांतर्गत पारितोषिक योजनेत २.५ लक्ष रुपयांची तरतूद करण्यात आली आहे. 

महाराष्ट्र शासनाकडून आर्थिक वर्ष २०२३-२४ करिता ९१६७ लक्ष अनुदान प्राप्त होईल अशी अपेक्षा आहे केंद्रशासनाकडून श्री गुरु गोबिन्द्सिंघजी अध्यासन संकुल व संशोधन केंद्र बांधकाम व एनर्जी ऑडिट सिस्टीम करिता सन २०२३-२४ मध्ये अनुदान प्राप्त होईल. त्याकरिता १९५० लक्ष ची तरतूद केली आहे. रुसा अंतर्गत प्रस्तावित आर्थिक वर्षामध्ये २११७ लक्ष प्राप्त होतील. 

उपरोक्त अर्थसंकल्पाच्या सहाय्याने विद्यापीठांमध्ये मूलभूत, समाजोपयोगी, नवीन आंतरविद्याशाखीय संशोधन कार्यासाठी सर्व प्रकारच्या सोयी उपलब्ध होणार आहेत. यामुळे संशोधनाला चालना मिळेल व औद्योगिक प्रकल्प यामधून तयार होतील. 

या अर्थसंकल्पावर अधिसभेच्या सन्माननीय सदस्यांनी विद्यापीठ व संलग्नित महाविद्यालयातील शिक्षण व संशोधन, विद्यार्थी विकास, शिक्षक प्रशिक्षण यावर सूचना मांडल्या व त्याचा अंतर्भाव सदर अर्थसंकल्पामध्ये करण्यात आला. उपस्थित सर्व सभासदांनी हा अर्थसंकल्प विकासाभिमुख आहे आणि पुढील काळात विद्यापीठाच्या विकासासाठी उपयुक्त ठरेल अशी आशा व्यक्त केली.