बीडचा धावपटू अविनाश साबळेला अर्जुन पुरस्कार 

शरथ कमलचा मेजर ध्यानचंद खेल रत्न पुरस्काराने गौरव 

नवी दिल्ली,१४ नोव्हेंबर /प्रतिनिधी :- दोन दशके आंतरराष्ट्रीय टेबल टेनिस खेळत असलेल्या शरथ कमलचा मेजर ध्यानचंद खेल रत्न पुरस्काराने गौरव करण्यात येणार आहे. अॅथलीट अविनाश साबळे, पॅरा बॅडमिंटनपटू मानसी जोशी, मल्लखांब खेळाडू सागर ओव्हळकर यांची अर्जुन पुरस्कारासाठी, तर सुमा शिरुर द्रोणाचार्य पुरस्कारासाठी सन्मानित केले जाणार आहे.गेल्या १० राष्ट्रकुल क्रीडा स्पर्धांमधील स्टीपलचेस प्रकारात केनियाचे वर्चस्व दिसून आले आहे. १९९४नंतर या प्रकारात पदक जिंकणारा अविनाश हा पहिला बिगरकेनियन धावपटू आहे, हे त्याच्या यशाचे वैशिष्ट्य ठरेल.

अविनाश हा महाराष्ट्राच्या बीड जिल्ह्यातील मांडवा गावचा. शेतकरी कुटुंबातील अविनाशला वयाच्या सहाव्या वर्षीपासून शाळा गाठण्यासाठी सहा किलोमीटर अंतर पायपीट करावी लागायची. कारण या अंतरावर कोणतीही वाहतूक व्यवस्था तेव्हा नव्हती. बारावीपर्यंतचे शिक्षा पूर्ण झाल्यावर अविनाश लष्करात रुजू झाला. २०१५मध्ये त्याने प्रथमच आंतर-सेनादलाच्या स्पर्धेत भाग घेतला. त्याच्यातील ॲथलेटिक्समधील गुणांची प्रचीती आल्यानंतर अमरिश कुमार यांनी त्याला स्टीपलचेसचे मार्गदर्शन सुरू केले. यासाठी त्याला तीन महिन्यांत २० किलो वजन कमी करावे लागले. मग विविध स्पर्धांमधील यशस्वी कामगिरीमुळे राष्ट्रीय प्रशिक्षक निकोलाय स्नेसारेव्ह यांचेही त्याला मार्गदर्शन लाभले. टोक्यो ऑलिम्पिकमधून परतल्यानंतर अविनाशला करोनाची लागण झाली होती. परंतु त्यातून सावरत त्याने जिद्दीने पुनरागमन केले.

दीर्घ कालावधीनंतर खेल रत्न पुरस्कार केवळ एकाच खेळाडूस देण्यात येणार आहे. शरथ कमलने राष्ट्रकुल क्रीडा स्पर्धेत तीन सुवर्णपदके जिंकण्याची कामगिरी केली होती. त्याचाच खेल रत्न पुरस्काराने गौरव करण्यात येणार आहे. दरम्यान, जागतिक विजेती बॉक्सर निखत झरीन, राष्ट्रकुल क्रीडा सुवर्णपदक विजेता एल्दहौस पॉल, नवोदित बुद्धिबळ आर. प्रज्ञानानंद यांची अर्जुन पुरस्कारासाठी शिफारस करण्यात आली आहे. तीन ऑलिम्पिक, पाच राष्ट्रकुल आणि चार आशियाई क्रीडा स्पर्धा खेळलेल्या शरथने दहा वेळा राष्ट्रीय स्पर्धा जिंकली आहे. त्याला २००४ मध्ये अर्जुन; तसेच २०१९ मध्ये पद्मश्री पुरस्काराने गौरवण्यात आले होते. राष्ट्रीय क्रीडा पुरस्कार ३० नोव्हेंबरला राष्ट्रपती भवनात देण्यात येणार आहेत.

पुरस्कार विजेते : ध्यानचंद खेल रत्न ः अचंता शरथ कमल (टेबल टेनिस)

अर्जुन पुरस्कार ः सीमा पुनिया, एल्दोहौस पॉल, अविनाश साबळे (सर्व अॅथलेटिक्स), लक्ष्य सेन, एच एस प्रणॉय (बॅडमिंटन), अमित, निखत झरीन (बॉक्सिंग), भक्ती कुलकर्णी, आर. प्रज्ञानानंध (बुद्धिबळ), दीप ग्रेस एक्का (हॉकी), सुशिला देवी (ज्यूदो), साक्षी कुमारी (कबड्डी), नयन मोनी सैकिया (लॉन बाउल), सागर ओव्हळकर (मल्लखांब), एलावेनील वलारिवान, ओमप्रकाश मिथ्रावाल (नेमबाजी), स्रीजा अकुला (टेबल टेनिस), विकास ठाकूर (वेटलिफ्टिंग), आंशू (कुस्ती), परवीन (वुशू), मानसी जोशी (पॅरा बॅडमिंटन), तरुण धिल्लॉन (पॅरा बॅडमिंटन), स्वप्नील संजय पाटील (पॅरा जलतरण), जेर्निन अनिका जे (कर्णबधीर बॅडमिंटन).

द्रोणाचार्य पुरस्कार ः जीवनज्योत सिंग तेजा (तिरंदाजी), मोहम्मद अली कमार (बॉक्सिंग), सुमा शिरुर (पॅरा नेमबाजी), सुजीत मान (कुस्ती) द्रोणाचार्य

जीवनगौरव पुरस्कार ः दिनेश लाड (क्रिकेट), बिमल घोष (फुटबॉल), राज सिंग (कुस्ती). ध्यानचंद जीवनगौरव पुरस्कार ः अश्विनी अक्कुनजी (अॅथलेटिक्स), धरमवीर सिंग (हॉकी), बी. सी. सुरेश (कबड्डी), नीर बहादूर गुरुंग (पॅरा अॅथलेटिक्स).

राष्ट्रीय खेल प्रोत्साहन पुरस्कार ः ट्रान्स स्टेडिया, कलिंगा इन्स्टिट्यूट, लडाख स्की आणि स्नोबोर्ड संघटना मौलाना अब्दुल कलाम आझाद सर्वोत्तम विद्यापीठ पुरस्कार ः गुरु नानक देव युनिर्व्हिसिटी, अमृतसर