ठाकरे गटाचे भगदाड कायम; छत्रपती संभाजीनगरात माजी महापौर गजानन बारवाल यांच्यासह पदाधिकाऱ्यांचा शिवसेनेत प्रवेश
छत्रपती संभाजीनगर : मुख्यमंत्री एकनाथ शिंदे यांनी शिवसेनेत जवळजवळ १३ महिन्यांपूर्वी केलेल्या बंडानंतर शिवसेना पक्ष अधिकाधिक बळकट होत चालला आहे. ठाकरे गटातील बंडखोर आमदार आणि खासदारांसह ठाकरे गटाचे अनेक नेते, पदाधिकारी आणि कार्यकर्त्यांचा शिवसेनेत पक्षप्रवेश सुरुच आहे. ठाकरे गटाला पडलेल्या या भगदाडामुळे उद्धव ठाकरेंच्या चिंतेत भर पडत चालली आहे.
गेल्या महिन्यात विधान परिषदेच्या आमदार आणि ठाकरे गटाच्या प्रवक्त्या मनिषा कायंदे यांनी शिवसेनेत प्रवेश केला. त्यापाठोपाठ विधान परिषदेच्या उपसभापती नीलम गोऱ्हे यांनीदेखील शिवसेनेत प्रवेश केला. शिव चित्रपट सेनेतही मराठीतील दिग्गज कलाकारांचा समावेश आहे. तर युवासेनेचे नेते आणि आदित्य ठाकरेंचे निकटवर्तीय राहुल कनाल यांनीदेखील शिवसेनेत प्रवेश केला. या सगळ्यामुळे एकनाथ शिंदे यांच्या नेतृत्वाखाली शिवसेना पक्ष अधिकाधिक मजबूत होत चालला आहे.
दरम्यान, आता ठाकरे गटाला छत्रपती संभाजीनगरमध्ये आणखी एक मोठा धक्का बसला आहे. या ठिकाणच्या माजी महापौरांसह अनेक पदाधिकाऱ्यांनी शिवसेनेत प्रवेश केला आहे. मुख्यमंत्री एकनाथ शिंदे यांच्या उपस्थितीत ठाकरे गटाच्या पदाधिकाऱ्यांनी आणि कार्यकर्त्यांनी शिवसेनेत प्रवेश केला. या नव्या साथीदारांचं मुख्यमंत्र्यांनी त्यांच्या पक्षात स्वागत केलं.
एकनाथ शिंदे यांनी यासंबंधी एक ट्वीट केलं आहे. त्यात त्यांनी म्हटले आहे की छत्रपती संभाजीनगर महानगरपालिकेचे उबाठा गटाचे माजी महापौर गजानन बारवाल, माजी शाखाप्रमुख सतीश माहोरे, विभागप्रमुख कन्हैया देवतवाल, गुड्डू बन्सीवाल यांनी आज शिवसेना पक्षात जाहीर प्रवेश केला. यावेळी या सर्वांचे पक्षात स्वागत करून त्यांना भावी सामाजिक आणि राजकीय वाटचालीसाठी शुभेच्छा दिल्या. याप्रसंगी आमदार संजय शिरसाट, जिल्हाप्रमुख राजेंद्र जंजाळ उपस्थित होते. हा ठाकरे गटासाठी एक मोठा धक्का असून भविष्यात ठाकरे गटाला आणखी काय काय धक्के सहन करावे लागणार हे पाहणे महत्त्वाचे ठरणार आहे.
