उद्धव बाळासाहेब ठाकरे शिवसेनेची वंचित आघाडीबरोबर युती 

राज्याच्या राजकारणात नवी युती, ठाकरे-आंबेडकर एकत्र

मुंबई ,२३ जानेवारी  / प्रतिनिधी :- राज्याच्या राजकारणात आता आणखी एक युती समोर येत आहे. शिवशक्ती आणि भीमशक्ती पुन्हा एकदा एकत्र आले आहेत. शिवसेना पक्षप्रमुख उद्धव बाळासाहेब ठाकरे आणि वंचित बहुजन आघाडीचे प्रमुख प्रकाश आंबेडकर यांनी आज (23 जानेवारी) यांनी संयुक्त पत्रकार परिषद घेत युतीची घोषणा केली आहे. शिवसेनाप्रमुख बाळासाहेब ठाकरे यांच्या ९७ व्या जयंतीनिमित्त आज युतीची घोषणा करण्यात आली. मुंबईत झालेल्या या पत्रकार परिषदेला उद्धव ठाकरे आणि प्रकाश आंबेडकर यांच्यासह शिवसेनेचे सुभाष देसाई, संजय राऊत, अरविंद सावंत आणि वंचित बहुजन आघाडीच्या रेखाताई ठाकूर आणि अबुल खान व्यासपीठावर उपस्थित होते.

काय म्हणाले उद्धव ठाकरे ?

आज बाळासाहेब ठाकरे यांचा वाढदिवस आहे. प्रकाश आंबेडकर आणि मी एकत्र वाटचाल करण्यासाठी एकत्र आलो आहोत. माझे आजोबा आणि प्रकाश आंबेडकर यांचे आजोबा जिवलग मित्र होते. दोन्ही पिढ्यांचे वारसदार आणि जीवदान देणारे सहकारी ‘देश प्रथम’चा विचार करून एकत्र आले होते.” देशातील लोकशाही जिवंत ठेवण्यासाठी आम्ही एकत्र येत आहोत. पुढील राजकीय वाटचालीबाबत नंतर निर्णय घेऊ, असे उद्धव ठाकरे यांनी पत्रकार परिषदेत सांगितले.

 ‘देश प्रथम हा शब्द वापराला जात आहे. पण देशात एक भ्रम पसरवला जात आहे. लोकांना भ्रमात ठेवून हुकुमशाही लादली जात असते. त्याच वैचारिक प्रदुषणातून लोकांना मोकळं करण्यासाठी, राज्यघटनेसाठी आम्ही एकत्र आलो आहेत, असं म्हणत शिवसेनेचे पक्षप्रमुख उद्धव ठाकरे यांनी वंचितसोबत युती करण्याचे कारण सांगितलं आहे.

शरद पवार सोबत येतील अशी आशा : प्रकाश आंबेडकर

निवडणुकीत बदलाचे राजकारण सुरू होईल. आम्ही चळवळ सुरू केली. आमच्याच मित्रपक्षांनी ते गिळंकृत करण्याचा किंवा कमी करण्याचा प्रयत्न केला. आम्ही त्यांना बाजूला केले आणि आंदोलन सुरू ठेवले. भांडवलशाही, लुटारूंची राजवट सुरू झाली आहे. प्रकाश आंबेडकर यांनी यावेळी सांगितले की, मी कधीही दाऊसमध्ये उद्योग आलेले पाहिले नाहीत, फक्त करार केले जातात.

दरम्यान, शिवशक्ती आणि भीमशक्तीचा राजकीय प्रयोग पहिल्यांदा शिवसेनाप्रमुख बाळासाहेब ठाकरे यांच्या काळात झाला आणि आता शिवसेनेत फूट पडल्यानंतर त्याच प्रयोगाची पुनरावृत्ती होत आहे. याबाबत प्रकाश आंबेडकर यांना विचारले असता ते म्हणाले, “शरद पवार यांची प्रतिक्रिया मी वाचली. ते आमच्यासोबत येतील, अशी आशा आहे.