वैजापूर तहसील कार्यालयाच्या नवीन इमारतीच्या निविदेला दिलेली स्थगिती उठवा – राष्ट्रवादीचे जिल्हा उपाध्यक्ष विशाल शेळके यांची मागणी
वैजापूर,७ सप्टेंबर /प्रतिनिधी :- वैजापूर तहसील कार्यालयाच्या नवीन इमारतीच्या निविदेला दिलेली स्थगिती उठवा अशी मागणी राष्ट्रवादी काँग्रेस पार्टीचे जिल्हा उपाध्यक्ष विशाल शेळके यांनी प्रशांत द.नवघरे सचिव (बांधकाम) सार्वजनिक बांधकाम विभाग मंत्रालय मुंबई येथे भेट घेऊन केली.
बांधकाम विभागाचे सचिव नवघरे यांना दिलेल्या निवेदनात श्री. शेळके यांनी म्हटले आहे की, दुष्काळग्रस्त वैजापूर तालुक्याच्या वैभवात भर पडणाऱ्या वैजापूर तहसील कार्यालयांच्या नवीन इमारतीस शासन निर्णय क्र. बी एल डी – 2021/ प्रक्र 244 / ई- 8 मंत्रालय मुंबई दि. 15/12/2021 प्रमाणे 893.44 लक्ष रुपयाची प्रशासकीय मान्यता मिळाली होती. सदरील निविदेला टेंडर डी. टी. पी. ला मुख्य अभियंता सार्वजनिक बांधकाम विभाग औरंगाबाद यांनी मान्यताही दिली होती व निविदा ऑनलाईन करण्याची प्रक्रिया चालू असताना शासनाचे मुख्य सचिव यांचे दि. 18 -07-2022 च्या पत्रानुसार शासनाने दि. 20-07-2022 रोजी पत्र काढले की, सार्वजनिक बांधकाम विभागच्या अखत्यारीत राज्यस्तरीय योजने अंतर्गत दि. 01 एप्रिल 2021 पासून मंजूर करण्यात आलेल्या परंतु निविदा प्रक्रिया अद्याप पूर्ण झाली नाही अशा कामांच्या अंबलबजावणीस स्थगिती देणे बाबत पत्र काढले. त्यामुळे तालुक्यातील नागरिकांवर अन्याय झाला असून सदरील इमारतीचे स्ट्रक्चरल ऑडिट होऊन इमारत धोकादायक आहे म्हणून जाहीर करण्यात आले असून अजूनही तहसील कार्यालयातील कर्मचारी जीव मुठीत घेऊन कार्यरत आहेत.
सदरील कर्मचाऱ्यांच्या व नागरिकांच्या जीवाला धोका असून अनुचित काही प्रकार झाल्यास शासन यास जबाबदार राहील. वैजापूर तालुक्यात न्याय देण्यासाठी तत्कालीन उपमुख्यमंत्री व विरोधी पक्ष नेते अजित दादा पवार यांच्या सकारात्मक दृष्टीमुळे वैजापूर तहसील कार्यालयाच्या इमारतीस प्रशासकीय मान्यता मिळाली होती तसेच याप्रकरणी सचिव श्री.नवघरे यांनी लवकरच निविदा प्रसिद्ध करण्यात येईल असे आश्वासन दिल्याचे श्री शेळके यांनी सांगितले.
