नांदेड जिल्ह्यात कोरोनाचे नवीन दहा पॉझिटिव्ह व्यक्ती

नांदेड दि. 18 :- जिल्ह्यात आज सायं. 5 वाजेपर्यंत प्राप्त झालेल्या 226 अहवालापैकी 198 अहवाल निगेटिव्ह प्राप्त झाले तर दहा पॉझिटिव्ह बाधित व्यक्ती आढळल्यामुळे जिल्ह्यातील एकुण बाधितांची संख्या 296 एवढी झाली आहे. औरंगाबाद व हिंगोली जिल्ह्यातील दोन नवीन बाधितांचा यात समावेश आहे. मुखेड उपजिल्हा रुग्णालय कोविड केअर सेंटर येथील एक बाधित व्यक्ती बरा झाल्याने त्याला रुग्णालयातून सुट्टी देण्यात आली. आतापर्यंत एकुण 181 बाधित रुग्ण बरे झाली आहेत.
नवीन दहा पॉझिटिव्ह व्यक्तींमध्ये 5 पुरुष व 5 महिलांचा यात समावेश आहे. पुरुषांमध्ये सोमेश कॉलनी येथील 75 वर्षाचा एक, परिमलनगर येथील 47 वर्षाचा एक, चैतन्यनगर येथील 43 वर्षाचा एक, भगतसिंघ रोड येथील 24 वर्षेचा एक, औरंगाबाद येथील 33 वर्षाचा एका पुरुषांचा यात समावेश आहे. महिलांमध्ये कामठा बु येथील 2 महिला वय 19 व 22 वर्ष, गजानन कॉलनी तरोडा बु. येथील 42 वर्षाची एक महिला, विठ्ठल मंदिर मुखेड येथील 55 वर्षाची एक महिला तसेच हिंगोली जिल्ह्यातील कळमनुरी येथील 55 वर्षाची एक महिला बाधित व्यक्तीचा यात समावेश आहे.

आतापर्यंत 296 बाधितांपैकी 181 बाधितांना रुग्णालयातून सुट्टी देण्यात आली आहे. तर उर्वरित 102 बाधितांवर औषधोपचार चालू असून त्यातील 3 बाधितांमध्ये 52 वर्षाची एक महिला आणि 52 व 54 वर्षांच्या दोन पुरुषांची प्रकृती गंभीर स्वरुपाची आहे. आतापर्यंत कोरोनामुळे मृत्यू पावलेल्या व्यक्तींची संख्या 13 झाली आहे.

नांदेड जिल्ह्यात 102 बाधित व्यक्तींमध्ये डॉ. शंकरराव चव्हाण शासकीय वैद्यकीय महाविद्यालय विष्णुपुरी नांदेड येथे 18, पंजाब भवन कोविड केअर सेंटर येथे 66, मुखेड उपजिल्हा रुग्णालय येथे 13 बाधित व्यक्ती उपचारासाठी दाखल असून 5 बाधित व्यक्ती औरंगाबाद येथे संदर्भित झाले आहेत. गुरुवार 18 जून रोजी 45 व्यक्तींचे स्वॅब तपासणीसाठी पाठविण्यात आले असून त्यांचा अहवाल उद्या सायंकाळी पर्यंत प्राप्त होईल.

जिल्ह्याची कोरोना विषयी संक्षीप्त माहिती पुढील प्रमाणे आहे.
सर्वेक्षण- 1 लाख 45 हजार 683,
घेतलेले स्वॅब- 5 हजार 514,
निगेटिव्ह स्वॅब- 4 हजार 841,
आज पॉझिटिव्ह स्वॅब संख्या- 10,
एकुण पॉझिटिव्ह बाधित व्यक्ती- 296,
स्वॅब तपासणी अनिर्णीत संख्या- 232,
स्वॅब नाकारण्यात आलेली संख्या- 91,
मृत्यू संख्या- 13,
रुग्णालयातून सुट्टी दिलेली संख्या- 181,
रुग्णालयात उपचार घेत असलेले बाधित व्यक्ती- 102,
स्वॅब तपासणी चालू व्यक्तींची 45 एवढी संख्या आहे.

कोरोना संदर्भात जनतेने अफवांवर विश्वास ठेवू नये तसेच मनात कुठल्याही प्रकारची भिती न बाळगता अत्यावश्यक कामाशिवाय घराबाहेर पडू नये असे आवाहन नांदेडचे जिल्हा शल्य चिकित्सक डॉ. निळकंठ भोसीकर यांनी केले आहे. तसेच सर्व जनतेने आपल्या मोबाईलवर “आरोग्य सेतू ॲप” डाऊनलोड करुन घ्यावे जेणे करुन आपल्या सभोवती कोरोना बाधित रुग्ण असल्यास आपणास हे ॲप सतर्क करेल असे डॉ. निळकंठ भोसीकर यांनी स्पष्ट करुन प्रशासनास जनतेने सहकार्य करण्याचे आवाहन केले आहे.