ज्येष्ठ चित्रपट अभिनेता रजनीकांत यांना 51 व्या दादासाहेब फाळके पुरस्काराने गौरवण्यात येणार
नवी दिल्ली, 1 एप्रिल 2021
केंद्रीय माहिती आणि प्रसारण मंत्री प्रकाश जावडेकर यांनी आज 51 व्या दादासाहेब फाळके पुरस्काराचे मानकरी जाहीर केले. 2019 साठीचा पुरस्कार दिग्गज अभिनेते रजनीकांत यांना प्रदान करण्यात येणार आहे. 3 मे रोजी राष्ट्रीय चित्रपट पुरस्कारांबरोबर हा पुरस्कार प्रदान केला जाईल.
नवी दिल्ली येथे या पुरस्काराची घोषणा करताना जावडेकर म्हणाले की ज्यूरी सदस्यांनी ही निवड एकमताने केली होती, जी सरकारने मान्य केली. ज्युरींमध्ये खालील पाच सदस्यांचा समावेश होता.
आशा भोसले
मोहनलाल
विश्वजित चॅटर्जी
शंकर महादेवन
सुभाष घई
रजनीकांत यांच्या कर्तृत्वाविषयी बोलताना जावडेकर म्हणाले की, ते पन्नास वर्षांहून अधिक काळ भारतीयांच्या हृदयावर अधिराज्य गाजवणारे प्रमुख अभिनेते आहेत. फाळके पुरस्कार मिळाल्याबद्दल त्यांनी या महान अभिनेत्याचे अभिनंदन केले.
रजनीकांत यांचे पंतप्रधानांनी केले अभिनंदन
ज्येष्ठ चित्रपट अभिनेता रजनीकांत यांना दादासाहेब फाळके पुरस्कार जाहीर झाल्यानंतर पंतप्रधान नरेंद्र मोदी यांनी त्यांचे अभिनंदन केले आहे.
एका ट्वीटमध्ये पंतप्रधान म्हणाले, ” प्रेक्षकांच्या अनेक पिढ्यांमध्ये लोकप्रिय, वैविध्यपूर्ण भूमिका आणि प्रेमळ व्यक्तिमत्त्व … म्हणजेच श्री रजनीकांत . .
थलायवा यांना दादासाहेब फाळके पुरस्काराने सन्मानित करण्यात येणार आहे ही अत्यंत आनंदाची बाब आहे. त्यांचे अभिनंदन. “