शरद पवारांची शिष्टाई निष्फळ; उदयनराजे अखेर भाजपमध्ये

  • Post By आज दिनांक वेब टीम | Thu 12-09-2019 | 10:24:10 pm
  • 5 comments

शरद पवारांची शिष्टाई निष्फळ;

उदयनराजे अखेर भाजपमध्ये

सातारा : छत्रपती उदयनराजे भोसले यांनी अखेर भाजपमध्ये प्रवेश करण्याचा निर्णय घेतला आहे. त्यामुळे गेले काही दिवस सुरू असणाऱ्या संभ्रमाच्या वातावरणावर पडदा पडला आहे. सकाळी राजे यांनी राष्ट्रवादी कॉंग्रेसचे अध्यक्ष शरद पवार यांची भेट घेतली होती. त्यानंतर ते पक्षांतर करणार नाहीत, अशी अटकळ व्यक्त होत होती. मात्र ती फोल ठरवत राजे यांनी भाजपात जाण्याच्या निर्णयावर सायंकाळी शिक्कामोर्तब केले.

ऱाष्ट्रवादी कॉंग्रेसचे अध्यक्ष शरद पवार यांच्याशी उदयनराजेंनी आज चर्चा केली. त्यानंतर पाच तासांत त्यांनी हा निर्णय घेतल्याचे सूत्रांनी सांगितले. त्यानुसार उदयनराजें शनिवारी दि. 14 रोजी दिल्लीस जाऊन खासदारकीचा राजीनामा देतील. रविवारी दि.15 रोजी महाजनादेश यात्रेत समर्थकांसह भाजपमध्ये प्रवेश करतील. गेल्या महिनाभरापासून त्यांच्या प्रवेशाची चर्चा होती. त्यांच्या या निर्णयामुळे राष्ट्रवादी कॉंग्रेसला मोठा धक्का बसणार आहे. रविवारी साताऱ्यात मुख्यमंत्री देवेंद्र फडणवीस यांच्या महाजनादेश यात्रेत उदयनराजे दिसतील, असा हवाला जलमंदिरच्या संपर्क सूत्रांनी दिला .

अनेक दिवसांपासून चर्चेत असणारा उदयनराजे भोसले यांचा भाजप प्रवेश प्रत्येक मेगाभरतीमध्ये पुढे ढकलला जात होता.  उदयनराजे भोसले आणि मुख्यमंत्री देवेंद्र फडणवीस यांच्यात 10 सप्टेंबर रोजी 'वर्षा' बंगल्यावर दीड तास चर्चा झाली होती. सगळ्या घडामोडींनंतर अखेर खासदार उदयनराजे भोसले यांचा प्रवेश निश्चित झाला आहे.

राष्ट्रवादीच्या नेत्यांकडून मनधरणी करण्याचा प्रयत्न

खासदार उदयनराजे भोसले भाजपमध्ये जाणार असल्याची चर्चा गेल्या काही दिवसांपासून रंगत आहे. या पार्श्वभूमीवर राष्ट्रवादीच्या अनेक नेत्यांनी त्यांची मनधरणी करण्याचा प्रयत्न केला. परंतु उदयनराजेंनी कोणताही निर्णय जाहीर केला नव्हता. त्यानंतर पुण्यात उदयनराजेंची जवळच्या कार्यकर्त्यांसोबत बैठक झाली होती. यात देखील कार्यकर्त्यांनी त्यांना भाजपमध्ये न झाल्याचा सल्ला दिला होता. तर दुसरीकडे उदयनराजेंनी खासदारकीचा राजीनामा न दिल्याने त्यांना पक्षात घेण्यासाठी भाजपमधले काही नेते अनुत्सुक असल्याची चर्चा होती.

विधानसभा निवडणुकीच्या पार्श्वभूमीवर विरोधी पक्षाला लागलेली गळती कमी झालेली नाही.  राष्ट्रवादीचे नवी मुंबईतील बडे नेते, माजी मंत्री गणेश नाईक, मुंबईतील काँग्रेस नेते, माजी मंत्री कृपाशंकर सिंह यांच्यासह इंदापूरचे काँग्रेस नेते हर्षवर्धन पाटील यांनी काल भाजप प्रवेश केला.

काही दिवसांपूर्वीच केंद्रीय गृहमंत्री आणि भाजपचे राष्ट्रीय अध्यक्ष अमित शाह यांच्या उपस्थितीत राष्ट्रवादीचे दिग्गज नेते पद्मसिंह पाटील यांचे पुत्र आमदार राणा जगजितसिंह यांनी भाजपमध्ये प्रवेश केला. त्यांच्यासोबत राष्ट्रवादीचे माजी खासदार धनंजय महाडिक आणि काँग्रेसचे आमदार जयकुमार गोरे यांनी देखील भाजपमध्ये प्रवेश केला आहे.

भाजपच्या मेगाभरतीच्या पहिल्या टप्प्यात राष्ट्रवादीचे दिग्गज नेते मधुकरराव पिचड, त्यांचे पुत्र विद्यमान आमदार वैभव पिचड, आमदार शिवेंद्रराजे भोसले, संदीप नाईक, चित्रा वाघ, काँग्रेसचे आमदार कालिदास कोळंबकर यांनी मुख्यमंत्र्यांच्या उपस्थितीत भाजपमध्ये प्रवेश केला होता.

Best Reader's Review