Breaking News

मराठा क्रांती मोर्चेकऱ्यांवरील गुन्हे मागे घेण्याची प्रक्रिया गतीने राबविणार - गृहराज्यमंत्री दीपक केसरकर

  • Post By आज दिनांक वेब टीम | Sun 16-06-2019 | 01:24:45 pm
  • 5 comments
 
मराठा क्रांती मोर्चेकऱ्यांवरील गुन्हे मागे घेण्याची
प्रक्रिया गतीने राबविणार - गृहराज्यमंत्री केसरकर
मुंबई: मराठा क्रांती मोर्चेकऱ्यांवर दाखल झालेले गंभीर गुन्हे वगळता अन्य गुन्हे मागे घेण्याची प्रक्रिया लवकरात लवकर सुरू करण्यात येत आहे. ही प्रक्रिया गतीने राबविण्यात येईल, अशी ग्वाही गृहराज्यमंत्री दीपक केसरकर यांनी दिली.
       यासंदर्भात श्री. केसरकर यांनी मराठा समाजाच्या शिष्टमंडळासोबत नुकतीच बैठक घेतली. यावेळी गृह विभागाचे प्रधान सचिव (विशेष) अमिताभ गुप्ता,मराठा समाज शिष्टमंडळातील प्रतिनिधी सर्वश्री राजेंद्र निकम, दिलीप पाटील,बाबा गुंजाळ, रुपेश मांजरेकर, संजय पाटील, विवेक सावंत, श्रीमती  स्नेहा गावकर आदी उपस्थित होते.
 मोर्चेकऱ्यावंर दाखल झालेले गुन्हे मागे घेण्याची मागणी होत होती. पोलिसांवरील हल्ले आणि तत्सम गंभीर गुन्हे वगळता अन्य गुन्हे मागे घेण्यात येतील, अशी माहिती मुख्यमंत्री देवेंद्र फडणवीस यांनी विधिमंडळाच्या अधिवेशनादरम्यान दिली होती. त्याबाबत वित्तमंत्री सुधीर मुनगंटीवर यांच्या अध्यक्षतेखाली उपसमिती नेमण्यात आली. त्यामध्ये सार्वजनिक बांधकाममंत्री (सार्वजनिक उपक्रम) एकनाथ शिंदे, गृहराज्यमंत्री दीपक केसरकर तसेच डॉ. रणजित पाटील या उपसमितीचे सदस्य आहेत.
        बैठकीत श्री. केसरकर यांनी माहिती दिली की, मोर्चेकऱ्यांवरील मागे घ्यावयाच्या गुन्ह्यांबाबत पोलीस महासंचालकांकडून प्राप्त झालेला अहवाल विधी व न्याय विभागाकडे अभिप्रायासाठी पाठविण्यात आला आहे. येत्या आठ-दहा दिवसात पहिल्या टप्प्यातील अभिप्राय मिळाल्यानंतर उपसमितीची बैठक घेतली जाईल. त्यानंतर गुन्हे मागे घेण्याची प्रक्रिया राबविण्यात  येईल. अशाच प्रकारे टप्प्याटप्प्याने अहवाल प्राप्त झाल्यानंतर गुन्हे मागे घेण्यात येतील, असेही श्री. केसरकर  यांनी  यावेळी  सांगितले.

Best Reader's Review